respondit il, c’est que ie l’ay apportée de Bordeaux.

Apres ce petit entretient ils remonterent à cheual,
& au milieu de leurs troupes deuisant tousiours,
& faisant, mille galanteries, ils arriuerent au Fauxbourg
Saint Marcel, où le peuple accouroit à
la soule pour crier viue le Roy & Messieurs les Princes,
& point de Mazarin, de là à trauers de la foule du
monde ils sont venus descendre au Palais d’Orleans,
enuironnez d’vne merueilleuse escorte de braues, entre
lesquels estoient Monsieur de la Roche-Foucault,
Monsieur le Prince de Tarente, Monsieur du
Coudray-Montpensier, Monsieur de Guittault,
Monsieur de Chauagnac & plusieurs autres Seigneurs
& Gentils-hommes, apres quoy suiuoit vn
grand cortege de carosses ; apres celuy de S. A. R.
où estoit Monsieur de Chauigny auec quelques autres
Seigneurs, tous remplis d’vne ioye merueilleuse
de voir ces Princes triomphants en si bonne intelligence,
qu’ils font esperer par leur bonne vnion,
vne paix generalle pour le soulagement du peuple,
qui est rauy de voir ttiompher ses liberateurs, esperant
de là, de voir bien tost l’authorité Royale deliurée
de la tyrannie Mazarine, & le repos & tranquillité
parfaite de cette Monarchie.

FIN.