sa reputation : il n’y a sorte d’offense qui se doiue
plus dissimuler que celles des langues, des plumes
& des impressions. Ie ne pretẽds icy comprendre
les libelles diffamatoires iniurieux & scandaleux
faits aux chastimens, mais bien ceux qui ne
vont que contre les mauuais conseils qui portent
les Princes à mal-traitter leurs peuples.

Les ames genereuses se tiennent assez vangées
de faire cognoistre qu’elles se peuuent vanger.
Alexandre s’en mocquoit, Auguste les recompensoit,
Tybere les dissimuloit, Tite les méprisoit :
il n’appartient qu’aux Grands Rois de bien
faire, & oüyr mal parler.

Trois bons Empereurs, Theodose, Arcadius
& Honorius, pere, fils & nepueu, ont laissé sur
cela vne Loy diuine, qu’il semble qu’elle ait esté
dictée du Ciel. La voicy en François telle qu’elle
est en Latin au 7. Tiltre du neufiéme Liure du
Code, Si quelqu’vn par defaut de modestie & excés
d’impudence, croit qu’il luy soit permis d’attaquer nostre
reputation par des mesdisances malignes & insolentes,
& ennyuré de sa passion, se rendre detracteur de nostre
Gouuernement, nous voulons que pour cela, il ne soit sujet
à aucune peine, ny qu’il souffre rien de rude & rigoureux,
car si c’est par legereté, il le faut pardonner, si par
fureur, il y a de la pieté, si par iniure, on le doit remettre,
& partant nous voulons qu’on nous en reserue l’entiere
cognoissance, afin qu’en considerant la qualité des paroles
par celle des personnes, nous aduisions s’il le faut, ou
poursuiure ou dissimuler.