si est-ce qu’ils font tout ceder à leurs passions & à
leurs interests, & que la mort du Mancini par vn iuste iugement
de Dieu, qui leur deuroit seruir d’vne belle leçon, ne
peut diuertir leurs impietez, ny toucher en aucune façon la
dureté de leurs consciences, Rara fides vbi iam melior fortuna
ruit.

Ne sçait-on pas, dit nostre faux Royaliste, pour vn autre
argument, que la desobeïssance des peuples vient de ce
langage seditieux qui leur est appris par les Prince qui sortent
de leur deuoir, que le Roy ne commande pas, que c’est
le Mazarin qui obsede son esprit, & abuse de son authorité
dans les persecutions qu’il fait aux Princes qu’il éloigne, aux
Parlemens qu’il exile, & aux peuples qu’il foule d’vne infinité
de subsides & de taxes pour s’enrichir de leur pauureté,
& cent autres discours semblables aussi vieux que les reuoltes :
que le peuple ressemble la mer, immobile de sa nature,
& orageuse par accident, excité maintenant par les vents de
l’ambition de Mr le Prince, qui a formé la diuision que nous
voyons auiourd’huy dans l’Estat : Que tout cela s’est verifié
dans l’exemple de Mr le Duc d’Orleans, durant lequel, à
l’égard du Cardinal de Richelieu, on disoit les mesmes choses,
osté la qualité d’Estranger, & auquel toutefois le defunct
Roy prefera la protection de son Ministre, pendant
quoy l’on a veu tousiours l’obeïssance des peuples, que le
Roy n’a pas moins de droit de pretendre ny de conseruer,
bien qu’il n’aye que 14. ans, puisque la loy le veut, confirmée
par l’vsage qu’en ont fait ses predecesseurs, par consentement
des Estats qui l’ont receuë, des Parlemens qui
l’ont verifiée, & des peuples qui se sont armez pour sa defense,
contre ceux qui la faisoient seruir de pretexte à leur
ambition.

Encores que ce langage que vous dites estre aussi ancien
que les reuoltes ayt esté tenu presque dans tous les siecles
contre les Ministres, pensez vous persuader pour cela que
ce soit vn langage seditieux ; mais bien plustost celuy des
Tyrans & des meschans, qui ne veulent point de barrieres
à leur ambition, ny oüir de plaintes de leur gouuernement.