excitent, portent leur reproche en elles-mesmes, & ne meritent
en façon du monde d’estre considerées par des personnes
sages & dégagées de toute preuention d’interest &
de passion. C’est ainsi donc que le Cardinal quoy qu’agité de
tant de disgraces, se trouue neantmoins dans vn estat si aduantageux,
que de pouuoir plaider impunément sa cause deuant
ses ennemis, & les rendre les tesmoins de son innocence,
en mesme temps qu’ils voudront estre ses Iuges, & qu’ils
entreprendront le plus ardemment de le condamner ou de
le persecuter : ce qu’ils n’ont presque iamais fait ; que lors
qu’ils ont deu reconnoistre ses trauaux & luy decerner des
couronnes & des triomphes, pour les grands seruices qu’il
venoit de rendre au Roy & à l’Estat.

A-t’il donné la paix à la capitale du Royaume & à tout le
Royaume en mesme temps ? vne faction puissante s’esleue
contre luy, aigrit & fortifie les premiers dégousts de Monseigneur
le Prince qu’elle veut s’aquerir, & dont elle s’efforce
par mille artifices de corrompre la fidelité. Apres la detention
de ce Prince, a-t’il reduit auec vne incroyable diligence
les places de Normandie & de Bourgogne dans
les rigueurs extremes de l’hyuer, puis secouru Guise, dompté
Bourdeaux, appaisé toute la Guyenne, dans les chaleurs
extremes de l’esté ? pour toute recompense de si grands
seruices, on redouble contre luy les efforts de la cabale, & de
l’intrigue, au mesme temps qu’on les pouuoit croire esteintes
& estouffées.

Cependant le Cardinal batu d’vn si violent orage s’en esloigne,
ou pour l’appaiser, ou pour le faire fondre sur les ennemis :
au cœur de l’hyuer il les attaque, il les chasse de Rethel,
il les défait en bataille rangée, ou il taille en pieces leurs
meilleures troupes, & s’en reuient chargé de trophées &
plein de gloire à la Cour du Roy.

Pour de si admirables succez, il se deuoit bien promettre
l’applaudissement public, & il pouuoit bien considerer tant
d’ennemis vaincus cõme autant de victimes capables d’appaiser
le ressentiment de ses aduersaires : mais au contraire plus il
est glorieux, & plus on veut qu’il soit mal-heureux : mieux il