DE mettre à prix la teste & la vie des hommes, en sorte
que celuy qui se voit soûmis à vn jugement si rigoureux,
ne considere plus tous les autres hommes, que
comme autant de furies & de bourreaux, qui pensent auoir
droit de le massacrer, & regarde toute la terre deuenuë comme
le theatre de son supplice. C’est sans doute vn sujet capable
de toucher de compassion les ames les plus dures, & les
plus insensibles : mais que ce genre de condemnation, ou inoüy
en tant de lieux du monde, ou reserué à la punition des
plus scelerats d’entre tous les Corsaires, & les brigands publics,
soit pratiqué nouuellement, & où ? dans vn paїs estimé
iusques à cette heure l’asile general des malheureux, & par
qui ? par vn peuple renommé sur tous les autres, aussi bien pour
la douceur que pour la grandeur de son courage ; & contre
qui ? contre vn Chef des Conseils du Roy, contre vn premier
Ministre d’Estat, d’autant moins digne d’vn si rude traitement,
que ses plus cruels ennemis ne l’osent accuser de la
moindre cruauté ; contre vn Cardinal de la Maistresse auguste
de toutes les Eglises ; & contre vn Prince de la Ville capitale
du Royaume de Iesus-Christ. Ie dis hardiment, que c’est vn
prodige d’inhumanité qui doit attirer l’horreur de tous les
siecles, & couurir d’vn opprobre eternel & ineffaçable, ceux
qui se glorifient d’en estre les autheurs.

On sçait assez que Monseigneur le Duc d’Orleans, par vn
malheur deplorable en vn si grand Prince, n’a pas eu peu de
part à vne entreprise si estonnante : mais aussi ceux qui sçauent
quelle est la bonté & la tendresse de son naturel, tout humain
& tout Royal, ne doutent point qu’en cette rencontre il n’ait
agy par des impressions estrangeres, que l’on n’ait seduit son
esprit pour abuser de la sincerité de ses intentions, & qu’il n’ait
souffert violence auant que de la faire, ou de l’authoriser par
son suffrage.

I’en dis de mesme du puissant Senat, qui a prononcé cét Arrest
funeste tumultuairement, & à l’impourueu, se laissant aller
au torrent d’vne cabale née de l’animosité de peu de personnes
offensées & interessées, n’estant pas croyable qu’vne Compagnie
qui a receu du Roy tout ce qu’elle a d’authorité, & qui
pour l’ordinaire a paru ne point auoir de sentiment plus vif ny