Anonyme [1652], LE SOVPER ROYAL DE PONTOISE, FAIT A MESSIEVRS LES DEPVTEZ des six Corps des Marchands de cette Ville de Paris. En Vers Burlesques. , françaisRéférence RIM : M0_3705. Cote locale : B_15_42.
Lors on dit bas & non pas haut, Voicy monsieur de Guenegaut Qui monte seul & sans escorte, Et qui quelque nouuelle apporte, Le quel parlant au sieur Patin, Luy dit, c’est pour demain matin, Auant les huict heures sonnées Que choses seront ordonnées, Qu’aurez response par escrit Pendant quoy le Roy a prescrit De vous semondre & de vous dire, Qu’aujourd’huy sans noise & sans ire, Sans autrement vous esquipper Vous faut tous ensemble souper : C’est à quoy le Roy vous conuie Qui de bien faire a grande enuie, A tous les Bourgeois de Paris, Les tenant pour ses Fauoris, Qu’aucun donc ne soit en demeure, Et qu’vn chacun se trouue à l’heure, Pour ne pas perdre vn tel repas. Vn dit, ie n’y manquerons pas, L’autre pour honnorer la trouppe Dit, ie suiuray Monsieur en crouppe, Ainsi de l’vn à l’autre bout, Rejoüissance estoit par tout, Et en peu l’on vit l’allegresse Se mesler auec leur tendresse, Ne croyans pas ces Deputez Estre du Roy ainsi traitez.
Rien ne seruit leur preuoyance, Car ils eurent telle abondance Que dans vn temps mesme de paix On ne pouuoit trouuer iamais : Onques on ne vit compagnie Si fort joyeuse & si rauie. Le mot alloit de main en main, Nous ne mourerons point de faim, Le Roy preuoit à ce desordre Nous donnant à tous dequoy mordre Et voit assez bien les deffaus De ceux que l’on nomme badaus, En faut vser de bonne sorte Et empescher que nostre escorte, Ne vienne nous escornifler, Et qu’on n’entende renifler Ny gens de sac, ny gens de corde, Ny valets & que nul n’aborde, Si ce n’est vn predestiné. Au lieu qui nous est destiné.
Afin que rien on ne vous taise Ie vous diray par parentaise, Qu’on fit ce souper somptueux Chez des gens qui sont assez gueux, Qui pour symbole ont la besace, Qui quelquefois est efficace, Qui sont des quatre mendians, Et comme tels sont supplians, Qui n’ont aucun bien ny cheuance, Bref, sont messieurs de l’Obseruance, Qui retirez dans le dortoir On ajusta leur refectoir. Sur table on mit la nappe blanche, Et quand c’eut esté le Dimanche Tout n’eust pas mieux esté paré, Tant tout estoit bien escuré : Enfin comme l’on vid paroistre Les Deputez de dans le Cloistre, Ils furent conuiez d’entrer Au lieu où ils deuoient souper, Où ce qui estoit remarquable ; C’est qu’il n’y auoit rien sur table Qui ne fut semé de bouquets Que pour s’asseoir c’estoient des aits, Que les mains seruoiẽt de mouchettes Qu’apres on en feroit fourchettes.
|