LE REVEILLE-MATIN
DE LA FRONDE
ROYALLE,
SVR
LA HONTEVSE PAIX
de Bourdeaux.
LA France, qui entre toutes les Monarchies de la
Chrestienté, a eu de tout temps l’aduantage d’auoir
eu des Rois les plus iustes du monde, a esté
neanmoins reduite à cette extremité de misere,
que le Sceptre venant à tomber entre les mains des Rois
mineurs, elle n’a iamais esté gouuernée que par des Ministres
si cruels & si barbares, que les Reynes Regentes ne
leur ont pas si-tost eu donné l’administration de l’Estat,
que seduisant la bonté de ces meres bien intentionnées,
leur propre vtilité les a obligez de leur persuader, que tout
leur estoit indifferamment permis pour regner auec authorité,
sans auoir le iugement de considerer si l’on peut
regner souuerainement en permettant tout : Que toute
sorte de cruautez estoient licites pour se rendre absolu
dans le Royaume, sans estre bien certain si la violence est
le meilleur fondement de la domination : En vn mot ils ont
fait entendre à ces Reynes, qu’on peut sans scrupule rauir
le bien de ses subjets pour estre maistre de leur vie, sans
sçauoir si la tyrannie est le plus fort appuy de la Souueraineté.