Le Roy persista tousiours à leur demander des preuues & des fondemens de
leur authorité, en des termes presque semblables à ceux du iour precedent, &
alors le President dit :

Le President. Voicy la troisiéme fois que vous auez desobey à la Cour,
en ne vous iustifiant que par mespris & par arrogance. Et puis se tournant
vers l’Orateur il dit, Monsieur l’Orateur faites vostre charge.

Et l’Orateur presenta vn papier au Roy, luy commandant pour la derniere
fois de respondre à ses accusations. Et le Roy l’ayant leu, dit :

Le Roy. Ie vous dis encore vne fois, que ce n’est pas la crainte de la mort
qui m’oblige à contester auec vous de vostre authorité ; Ie vois bien que
toutes ces formalitez ne sont que des grimaces pour eluder mes subjets ;
& que pour establir authentiquement vostre nouuelle & illegitime authorité,
vous en voulez faire l’essay, & en jetter le fondement sur ma
Personne, esperant qu’on ne disputera point à se ranger sous des Loix,
que le Legislateur luy mesme aura signées de son sang, de mesme qu’il n’y
a point de plus grand tesmoignage de la verité de la Loy Chrestienne, (si
j’ose vser de cette comparaison) que la Mort de IESVS-CHRIST, qui
la seellée de son propre Sang : Mais si vostre interest tyrannique vous
oblige d’éluder le peuple, ie suis obligé par la qualité de Pere & de Gouuerneur
de le desabuser, & de maintenir ses libertés & ses priuileges :
Alors le Roy fut interrompu par le President, qui dit :

Le President. Vrayement vous auez bien maintenu les libertez & les
priuileges du peuple.

Le Roy. I’en atteste Dieu & tous mes Peuples à tesmoins ; & vous mesmes
n’estes pas ignorans, que c’est pour auoir contrecarré vostre tyrannie,
& n’auoir pas voulu l’authoriser de mon consentement, que ie suis
l’objet de vostre indignation & de vostre rage. Mais pour reprendre mon
discours.

Ie vous disois que ce n’estoit pas la crainte de la mort qui m’obligeoit à
contester de vostre authorité, mais bien l’interest de mes Peuples, ne
pouuant en conscience consentir à la ruïne des Loix fondamentales, qui
les ont gouuernez des siecles entiers si heureusement, & sans lesquelles
vous mesmes & vostre posterité ne sçauriez viure sans des dangers &
des craintes continuelles, puisque la force establit des Religions & des
Loix, ausquelles vn chacun se doit soumettre sans appel. Et le Roy dit en
suitte plusieurs choses qu’il auoit dit le iour precedent, & fit voir que le Parlement
n’estoit pas conuoqué legitimement, & qu’il estoit imparfait, la Noblesse
& le Clergé en estant bannis, & n’y ayant presque pas vn des membres qui y
auoient pris seance par élection : Alors le President prenant la parole dit.

Le President. Vous ne cesserez point de charger de calomnies & de
mespris le Parlement. Mais vous apprendrez par les effets que cette
Cour est vne Cour de Iustice, vostre recusation & vostre silence nous
sort d’adueu. Il est vray que vos actions parlent d’elles-mesmes, & que