Anonyme [1643], LE PRINCE VENDV, OV CONTRACT DE VENTE DE LA personne du Prince libre & innocent DOM EDOVARD INFANT DE PORTVGAL, passé à Vienne le 25. iour de Iuin 1642. OV FVRENT PRESENTS Le Roy de Hongrie comme Vendeur. Le Roy de Castille comme Acheteur. ET STIPVLANS DANS LE CONTRACT POVR LE ROY DE CASTILLE. Dom Francisco de Mello Gouuerneur de ses armées en Flandres. Dom Emmanuel de Moura Cortereal, son Ambassadeur en Alemagne. Pour le Roy de Hongrie. Frere Diego de Quiroga Moine, son Confesseur. Et le Docteur Nauarre Secretaire de la Reine de Hongrie. Le tres-haut Prince & Infant Dom Edoüard, frere du Serenissime Roy de Portugal Dom Iean IV. a esté vendu au prix de 40000 Richedales. TRADVIT DE L’ESPAGNOL. , françaisRéférence RIM : Mx. Cote locale : C_6_66.
page précédent(e)

page suivant(e)

-- 8 --

que par le sort de la guerre, ou par vn caprice de
la fortune, quelque prisonnier du party contraire
tomboit entre ses mains ; car il trouuoit en
luy vne liberalité égale à sa force, & vne prudence
qui répondoit noblement à sa courtoisie. Il
n’y auoit point de soldat dans toute l’Allemagne
qui ayant recours à luy dans quelque necessité,
n’emportât d’abord la liberté s’il l’auoit perduë,
ou de l’argent s’il estoit incommodé. Sa table
aussi bien que sa bourse estoit ouuerte à toutes
sortes de personnes, & bien souuent quand ses
gens n’estoient pas payez, il leur faisoit faire
montre de ses deniers. Les Marchands de Hambourg,
de Venise & de plusieurs autres endroits,
qui luy ont souuent fait tenir du Portugal par
lettres de change plusieurs millions de Richedales,
peuuent témoigner des despences extraordinaires
qu’il a faites pour la conseruation d’vn
Empire, qui ne s’est seruy de son or que pour
luy donner des chaisnes de fer. C’estoit le pere
des soldats, il n’en vouloit pas estre traité de Prince
ny de General, mais d’amy & de compagnon.
Au reste il ne laissoit passer aucune occasion où il
pût auancer les affaires de Ferdinand qu’il n’embrassât
auec vne fidelité égale à la grandeur de
son courage. Et parmy les impietez necessaires
que la guerre introduit dans le monde, il fut
tousiours fort zelé pour la Religion Catholique,
& pour les interests de la pieté. Diray-ie icy qu’il


page précédent(e)

page suivant(e)